Geschichtsverein Rösrath
      Rösroder Verzäll
     
 
Schloss Eulenbroich, Ülepooz
Däm Jeschichtsverein singe Setz

Ehr künnt vorbeikumme:
donnersdaachs vun 16-18 Uhr		      

Deefe Löcher

Rösroder Verzäll em Janewar 2010 - opjeschrevve vum Caesarius

Och ... wat ha'mer doch em Winter op uns Stroße esu vill vun dänne jruße Löcher en de Stroß. Un dat es nit nor en Rösrod esu ... nä ... och en Schäbbich Jläbbich un dröm eröm. Dä Winter met sing Kälde mäht de Stroße kapott. Ävver nit nor de Stroß, och de Autos. Dat Zeuch us dänne Löcher litt op de Stroß eröm. Un ... Pitsch ... es ald widder e Steinche en dr Lack jetitsch. De Autofahrer sin am Schänge: "Üvverall nor noch Löcher ... Dat mäht de Stoßdämpfer kapott. Do künne mer uns neu Autos, die mer uns jetz met de Avwrack-Prämie zojelaht han, demnächs als widder avwracke."


  

  


Dä Wellem us Rösrod meint: "Die Löcher weeden met dr Zigg immer jrößer, wa'mer se nit stopp. Do bruche mer kei "Wachstumsbeschleunijungsjesetz". Dat jeiht vun janz allein. Die Löcher en dr Stroß weeden jrößer un jrößer. Su wie das Loch en mingem Jeldbüggel. Je ehter mer dat Loch stopp, desto winnijer Jeld jeiht flöte."

Caesarius Volberg



Üvvermorje es hück vörjester

Hee ha'mer opjeschrevve, wodrüvver die Lück en Rösrod jrad am Schwaade sin. Ov dat all esu richtich es ... mer wessen et nit. Mänchmol sin de Problemche vun hück üvvermorje nor noch zom Laache. Mänchmol es et och ömjekihrt.

Wann ehr demnächs mieh vun dänne Verzällcher lese oder nohluure wollt, wat füne Klaaf mer ald all dokumenteet han, dann luurt ens hee: Rösroder Verzäll 2010.

Üvvermorje es hück vörjester ... alsu Jeschichte! Wann ehr wollt, künnt ehr jo üvvermorje dä Verzäll noch ens nohlese un Üch froge: Wat es druss jewoode?

Dä Rösroder Verzäll hät dä Caesarius opjeschrevve. Nevve dä Schwaaderei vun dänne Lück hätte och die Bildche vun dänne jruße Löcher jemaht. Wann ehr jet loss wääde wollt oder wann ehr jet ze nöttele hat, dann künnt ehr däm Caesarius och en E-Mail schecke. Die Adress fingt ehr ungen drunger.

Ne schöne Jroß
vum Caesarius

         caesarius2010@gv-roesrath.de