Geschichtsverein Rösrath
      Rösroder Verzäll
     
 
Schloss Eulenbroich, Ülepooz
Däm Jeschichtsverein singe Setz

Ehr künnt vorbeikumme:
donnersdaachs vun 16-18 Uhr		      

Dat köhle Klima

Rösroder Verzäll em Febrewar 2010 - opjeschrevve vum Caesarius

Köln-Rösrath. Och ... wat ha'mer doch dis Johr för e köhl Klima. Daachlang litt dr Schnei eröm, un de Autofahrer em Berjische sin am Schänge. Ov se e GL- oder ov se e K-Kennzeeche draan han ... es däm Wedder eijentlich driss ejaal. Mänch einer litt et Auto stonn un fäht met de Bahn noh Kölle, en de Metropole. Vun Könichsfors (Köln-Rath) us met de Linie 9 nohm Nümaat: 2,40 Euro. Köln-Rath es Kölner Stadtjebiet. Vun Rösrod us koss dat em Momang noch 3,40 Euro. Wa'mer Kölner Stadtjebiet wöre ...

Rösrod Alaaf


  

  

  


Dä Wellem us Rösrod meint: "Nit nor en Kölle jitt et mänchmol ene Usrötscher. Dis Daach ben ich vör ming Huusdör usjerötsch un fies op et Föttsche jefalle. Wäjen dä deefe Temperature hee em Berjische. Ov mer winnijer rötsche däte ... wa'mer kölsch Stadtjebiet wöre ... jleuv ich nit. Ov mer winnijer Meet zahle däte ... dat jleuv ich bestemp nit. "

Caesarius Volberg



Üvvermorje es hück vörjester

Hee ha'mer opjeschrevve, wodrüvver die Lück en Rösrod jrad am Schwaade sin. Ov dat all esu richtich es ... mer wessen et nit. Mänchmol sin de Problemche vun hück üvvermorje nor noch zom Laache. Mänchmol es et och ömjekihrt.

Wann ehr demnächs mieh vun dänne Verzällcher lese oder nohluure wollt, wat füne Klaaf mer ald all dokumenteet han, dann luurt ens hee: Rösroder Verzäll 2010.

Üvvermorje es hück vörjester ... alsu Jeschichte! Wann ehr wollt, künnt ehr jo üvvermorje dä Verzäll noch ens nohlese un Üch froge: Wat es druss jewoode?

Dä Rösroder Verzäll hät dä Caesarius opjeschrevve. Nevve dä Schwaaderei vun dänne Lück hätte och die Bildche vun däm Schnei jemaht, dä jetz üvverall eröm litt. Wann ehr jet loss wääde wollt oder wann ehr jet ze nöttele hat, dann künnt ehr däm Caesarius och en E-Mail schecke. Die Adress fingt ehr ungen drunger.

Ne schöne Jroß
vum Caesarius

         caesarius2010@gv-roesrath.de