Geschichtsverein Rösrath
      Rösroder Verzäll
     
 
Schloss Eulenbroich, Ülepooz
Däm Jeschichtsverein singe Setz

Ehr künnt vorbeikumme:
donnersdaachs vun 16-18 Uhr		      

Wervetafele

Rösroder Verzäll em Aujuss 2010 - opjeschrevve vum Caesarius

Och ... wat ha'mer doch en Rösrod esu vill vun dänne Wervetafele. Alle naslang süht mer se aan der Stroß. Jeworve weed för Jott un de Welt, un wat de Lück söns noch metkrije solle.

Et jitt Ungerscheede: Plakate ohne Bildche un miestendeils met vill vill Bochstave, die esu mickrich sin, dat mer se vum Auto us üvverhaup nit lese kann. Op de ander Sigg süht mer ävver och fein parat jemahte Tafele met Bildche för Hin-ze-Luure.

Dobei es et en Taktik vun dänne Wervefritze, dat jliche Plakat möglichs off üvverall ze plakateere, domet dat bei de Lück nit mih us em Kopp jeiht.















Dä Bätes us Kleeneeche meint: "Die bunte Werve-Aanhängerche aan de Kölner Stroß en Kleeneeche, tirek hinger de neu Ampel, weede immer mih. Et bess ze sinn för de Autofahrer us Kölle es dat blaue Aanhängerche, wat janz hinge steiht. Nor de Schriff es jet klein jerode."

Caesarius Volberg


Üvvermorje es hück vörjester

Hee ha'mer opjeschrevve, wodrüvver die Lück en Rösrod jrad am Schwaade sin. Ov dat all esu richtich es ... mer wessen et nit. Mänchmol sin de Problemche vun hück üvvermorje nor noch zom Laache. Mänchmol es et och ömjekihrt.

Wann ehr demnächs mieh vun dänne Verzällcher lese oder nohluure wollt, wat füne Klaaf mer ald all dokumenteet han, dann luurt ens hee: Rösroder Verzäll 2010.

Üvvermorje es hück vörjester ... alsu Jeschichte! Wann ehr wollt, künnt ehr jo üvvermorje dä Verzäll noch ens nohlese un Üch froge: Wat es druss jewoode?

Dä Rösroder Verzäll hät dä Caesarius opjeschrevve. Nevve dä Schwaaderei hätte och dat Bildche vun dänne Wervetafele jemaht. Wann ehr jet loss wääde wollt oder wann ehr jet ze nöttele hat, dann künnt ehr däm Caesarius och en E-Mail schecke. Die Adress fingt ehr ungen drunger.

Ne schöne Jroß
vum Caesarius

         caesarius2010@gv-roesrath.de