Geschichtsverein Rösrath
      Rösroder Verzäll
     
 
Schloss Eulenbroich, Ülepooz
Däm Jeschichtsverein singe Setz

Ehr künnt vorbeikumme:
donnersdaachs vun 16-18 Uhr		      

Drusse vör dr Düür

Rösroder Verzäll em Dezember 2010 - opjeschrevve vum Caesarius

Och ... wat hät dä Nikolaus doch en Rösrod esu vill ze dun. Met singem Säckelche op em Rögge süüt mer en alle naslang de Wäng huhklimme. Wat well dat Käälche eijentlich do bovven? Durch et Finster ensteije? Kann dä nit de Düür nämme? Wat passeet, wann jrad en däm Momang, wo hä am ensteije es, Google-Street-View vorbeikütt? Jo ... et Jeseech weed unkenntlich jemaht ... ävver met dä Klamotte hät hä kein Schangs. Dann es hä opjefalle.


     


     


Dä Manes us Hoffnungsthal meint: " Wann ich mer dat Schmölzje op däm Jruppenfoto su beluure, dann passen dä Nikolaus, dat Dierche en de Medse un dä Schniemann doch schön beienein. "

Caesarius Volberg



Üvvermorje es hück vörjester

Hee ha'mer opjeschrevve, wodrüvver die Lück en Rösrod jrad am Schwaade sin. Ov dat all esu richtich es ... mer wessen et nit. Mänchmol sin de Problemche vun hück üvvermorje nor noch zom Laache. Mänchmol es et och ömjekihrt.

Wann ehr demnächs mieh vun dänne Verzällcher lese oder nohluure wollt, wat füne Klaaf mer ald all dokumenteet han, dann luurt ens hee: Rösroder Verzäll 2010.

Üvvermorje es hück vörjester ... alsu Jeschichte! Wann ehr wollt, künnt ehr jo üvvermorje dä Verzäll noch ens nohlese un Üch froge: Wat es druss jewoode?

Dä Rösroder Verzäll hät dä Caesarius opjeschrevve. Nevve dä Schwaaderei vun dänne Lück hätte och die Bildche vun däm Nikolaus un däm Schmölzje jemaht. Wann ehr jet loss wääde wollt oder wann ehr jet ze nöttele hat, dann künnt ehr däm Caesarius och en E-Mail schecke. Die Adress fingt ehr ungen drunger.

Ne schöne Jroß
vum Caesarius

         caesarius2010@gv-roesrath.de